في ناس كتير اوي بتحن للأيام دي لأيام الرئيس مبارك .. رغم ان الايام دي معيشيا واقتصاديا صعبة جدا و كتير من طبقات المجتمع ابتدت تعانى من الغلاء والتضخم وانخفاض سعر الجنيه قدام الدولار وان ملايين الناس مش قادرة ولا عارفة تعيش ولا عارفة تمشي حياتها ومتطلبات الحياة بقت كبيرة اوي وصعبة والضغوط زادت و الاسعار ارتفعت اضعاف مضاعفة ..
بس انا فاكر من حوالي ٢٠ سنة او اكتر شوية ايام الرئيس مبارك كانت تفويلة العربية بنزين ب ٣٦ جنيه وكان في ناس كتير بتشتكي برضه ومش قادرة و بتقول ٣٦ جنيه كتير والبنزين غالي وكانوا من الطبقة المتوسطة .. وفاكر كانت مصاريف المدرسة ب ٢٥ جنيه و٤٠ جنيه او اكتر شوية بسيطة وناس كتير بتشتكي ومش راضية ومش قادرة تدفع وفاكر علبة السجاير برغم اني مابشربش سجاير كانت ب ١٣٥ قرش وكانوا بيقولوا غالية وكانوا مش راضيين وبيقولوا بنشربها ننفخ فيها ونطلع فيها قرفنا .. برغم كان تعداد الناس ف مصر حوالي ٦٥ مليون نسمة .. نفس الحاصل دلوقتي ولكن الاختلاف اولا الشعب زاد فوق ٤٠ مليون نسمة .. ثانيا اللي كان زمان رفاهيات والناس تقدر تستغني عنه دلوقتي بقا اساسيات وبياخد من دخلك سواء مرتب او معاش او عمل حر
.. الفرص قلت عن زمان بسبب زيادة عدد الناس .. اهتمام الدولة اكتر بالمشروعات الكبري وجت علي الحالة الاقتصادية للناس مع زيادة عدد الناس زاد الفقر والمعاناة .. انما الحياة هي الحياة ولو رجعنا لزمن الرئيس السادات كان عدد السكان اقل بكتير وكان في ملايين معترضة ومش قادرة تعيش وبتعاني برضه وكان في ناس وقتها بتحلم بكيلو لحمة وكانوا موظفين ومن الطبقة المتوسطة اللي هي عصب مصر دة وضع مصر علي مدار سنين كتير اوي فاتت .. والله المستعان .. وافوض امرى الي الله ان الله بصيرا بالعباد .
كتابة خاصة احمد بكرى اليمانى
Post a Comment